వెలిగొండ కాలువలో నీళ్లు తాగుతున్న వానరాలు.. వీడియో పోస్ట్ చేసిన సీఎం చంద్రబాబు

ఆంధ్రప్రదేశ్ ముఖ్యమంత్రి చంద్రబాబు తాజాగా సోషల్ మీడియాలో ఒక ఆసక్తికరమైన వీడియోను పంచుకున్నారు. నిన్న ప్రారంభమైన వెలిగొండ ప్రాజెక్టు ఫీడర్ కాలువలో కొన్ని కోతులు గుంపుగా వచ్చి నీళ్లు తాగుతూ తమ దాహాన్ని తీర్చుకుంటున్న దృశ్యాలు ఆ వీడియోలో ఉన్నాయి. "జలం.. జీవం.. జీవితం" అంటూ ఆయన ఈ వీడియోకు క్యాప్షన్ జోడించారు. ఈ పోస్ట్ ప్రస్తుతం వైరల్ అవుతోంది.

మార్కాపురం జిల్లాలో దశాబ్దాల నాటి కలను సాకారం చేస్తూ సోమవారం పూల సుబ్బయ్య వెలిగొండ ప్రాజెక్టు తొలి దశను ముఖ్యమంత్రి చంద్రబాబు జాతికి అంకితం చేసిన విషయం తెలిసిందే. ఫీడర్ కెనాల్ నుంచి కృష్ణా జలాలను నల్లమల సాగర్‌లోకి విడుదల చేసి, ప్రాజెక్టును ప్రారంభించారు. ఈ చారిత్రక ఘట్టంతో స్థానిక ప్రజలు భావోద్వేగానికి గురయ్యారు.

ఈ నేపథ్యంలో, ప్రాజెక్టు ఫలాలు కేవలం మనుషులకే కాకుండా, ఆ ప్రాంతంలోని మూగజీవాలకు కూడా అందుతున్నాయనడానికి ఈ వీడియో నిదర్శనంగా నిలుస్తోంది. కరవు పీడిత ప్రాంతానికి సాగు, తాగునీరు అందించడమే లక్ష్యంగా ఈ ప్రాజెక్టును చేపట్టారు. పిల్ల కోతులతో సహా వచ్చి వానరాలు స్వేచ్ఛగా నీరు తాగుతుండటంపై సీఎం తన సంతోషాన్ని వ్యక్తం చేశారు. మానవులతో పాటు జీవరాశుల దాహార్తిని కూడా ఈ ప్రాజెక్టు తీరుస్తోందన్న భావనను ఆయన తన పోస్ట్ ద్వారా తెలియజేశారు.